Nakahanda na ang tanan nga mga eskwelahan sa syudad sang Bacolod nga magaserbe nga voting centers sa maabot nga May 9 national kag local elections.
Sa interview sang Bombo Radyo Bacolod kay Peter Galimba, assistant schools division superitendent sang Department of Education (DepEd) Division of Bacolod City, napreparar na sang mga manunudlo kag school heads ang mga kwarto nga pagahimuon nga polling precincts.
Suno kay Galimba, nakapreparar na ang mga manunudlo kag nakacoordinate na ang mga ini sa Commission on Elections (Comelec) kag sa local government units (LGUs).
Natalana buwas nga adlaw nga tsekyaron kag imonitor ang mga eskwelahan nga himuon nga polling precints agud nga mahibaluan kun ano ang mga issues kag concerns nga naengkwentro sang mga school personnel samtang ginapreparar ang mga buluthuan.
Kasubong man nga igaconvene buwas ang Division Election Task Force agud nga matumod man sang mga ini ang terms of reference sa nagahilapit nga eleksyon.
Wala pa sila sang nabaton nga mga concerns nga naengkwentro sang mga manunudlo apang tsekyaron pa sang mga ini ang mga supervisors.
Ginpahayag man sini nga ang mga manunudlo ang gina-abisuhan nga magpabilin nga non-partisan sa subong nga eleksyon.
Kaina sang aga, gin-orient man sang COMELEC ang mga manunudlo nga magaserbe sa tion sang piniliay.
Nagpanawagan man ini sa mga botante nga ang pagboto ang isa ka kinamatarong kag dapat gamiton ini sang insakto.
