Linibo ka mga estudyante sa Indonesia ang nagpatigayon sang hublag-protesta sa pagkadismaya sa tikang sang gobyerno nahanungod sa nagalala nga sitwasyon sang haze sa pungsod kag sa kaingod pungsod sini sa Southeast Asia sang mga nakaligad nga semana.
Kahapon, masobra 500 ang nag-intra sa protesta sa gwa sang Central Kalimantan Governor’s Office sa capital sang Palangkarya bitbit ang ila mga panawagan para sa solusyon sa nagaduging nga haze humalin pa sang Agosto.
Ginaduso man sang pila ka mga raliyista si Indonesian President Prabowo Subianto nga magdeklarar sang national emergency kag maghimo sang mas epektibo nga tikang agud punggan ang mga agricultural practices nga ginalantaw nga rason sang forest fires.
Ang nasambit nga lapnagon nga haze ang tuga sang mga forest fires nga nagalapta sa nagkalain-lain nga bahin sang pungsod, kalakip ang isla sang Borneo sa diin madamo ang na-record nga kaso sang sunog.
Nagresulta man sa 333,470 ka mga residente sa pito ka mga probinsya sang Indonesia ang na-record nga may acute respiratory illnesses bangud sa mga sunog, santo sa Ministry of Health sang pungsod.
Tuman man nga naapektohan ang kalidad sang hangin sa mga kaingod nga pungsod partikular sa Singapore, Malaysia, kag iban pa.
