Ginsuspinde ang klase sa Father Gratian Murray Integrated School sa Brgy. Granada, Bacolod City matapos nga ginapahayag nga gin-possess sang malain nga espiritu ang mga estudyante kaina sang aga.
Suno sa mga estudyante nga naistorya sang Bombo Radyo, kahapon pa nagsugod ang paglain sang pamatyag sang mga babayi nga estudyante sa Grade 8 kag Grade 9.
Suno kay Ariel Sablaon, head teacher sang Father Gratian Murray Integrated School, nakibot nalang ang mga manunudlo nga hinali lang nagwaras ang isa ka estudyante kag indi masarangan nga punggan sang isa lang katawo.
Sang gin-istorya ni Sablaon ang estudyante, wala ini nagapati nga may Diyos bangod lain ang ginaptihan sini.
Antes ang insidente, ginapahayag nga may nagpakita nga bata nga nagadalagan sa ibabaw sang blackboard.
Ang estudyante nga nakakita sa amo nga bata ang naglain ang pamatyag.
Ginapahayag nga lunsay mga babayi ang tuyo sang amo nga tinuga bangod luyag nila nga himuon ini nga prinsesa sa ila nga palasyo.
Ang mga estudyante nga naglain ang pamatyag ang nahamtang sa school building nga ginpatindog sang tuig 2016.
Gilayon nga nagpadulong sa eskwelahan ang mga personnel sang Bacolod City Health Office agud lantawon ang sitwasyon sang mga estudyante.
Suno kay Joanne Marie Jumaleza, Psychologist 3 sa CHO, ila pa iga-evaluate kun ano ang nagtublag sa mga kabataan.
Ila pa igadeterminar kun spiritual ukon psychological ang natabo.
Date of airing: July 9 (Bombo News and Views Afternoon Edition)
