Padayon pa ang search and rescue operation nga ginapatigayon sang mga otoridad sa ciudad sang Bacolod sa apat ka tuig nga bata nga nalunod sa subo sa Purok Pag-asa, Barangay Alijis, Bacolod City kahapon.
Sa interview sang Bombo Radyo Bacolod kay Edward Ramirez, Chief Operations sang Bacolod City Disaster Risk Reduction Management Office (DRRMO), wala pa sa gihapon nakita ang apat ka tuig nga bata.
Suno kay Ramirez, mga katapo sang Chamber, Amity, Bacolod City Fire Station, mga kapulisan kag Bacolod City Disaster Risk Reduction Management Office (DRRMO) ang nagpangita sang apat ka tuig nga bata.
Suno diri, ginsumay sang mga rescuers kag mga otoridad ang suba sang Goldenfield kag Sum-AG agud makita ang nalunod nga bata.
Aminado man ini nga may kabudlayan ang search and rescue operation bangud magluwas nga madulom kag nagainulan, mabaskog pa ang current sang tubig.
Samtang, sa pihak nga bahin, nagdangat sa 76 ka mga pamilya ukon kapin 226 ka mga indibidwal ang gin-evacuate sa anom ka mga barangay sa ciudad sang Bacolod.
Santo data sang Department of Social Services and Development as Septembre 13, 37 ka mga pamilya ang gin-evacuate sa Barangay Sum-ag, 15 nagikan sa Barangay Handumanan, napulo sa Barangay Pahanocoy, walo sa Barangay Cabug, lima sa Barangay Sincang-Airport kag isa sa Barangay Alijis.
Ang mga evacuees ang yara sa karun sa pinakamalapit nga eskwelahan ukon gymnasium
Pila sa mga ini ang ginpaevacuate na nga daan bangud sa nagasaka nga level sang tubig nga dala sang madamol nga pag-ulan bangud sa hangin habagat nga mas ginpabaskog sang Bagyo Ferdie.
Nagpanugyan man ini sa mga residente nga mag-aligmat kag kun ginapaevacuate mag-evacuate na gilayon.
