Ginhatagan na sang clearance sang 79th Infantry Battalion sang Philippine Army ang mga evacuees sa nagluntad nga engwentro sa Sitio Bairan, Barangay General Luna, Toboso, Negros Occidental nga makapauli sa ila tagsa ka panimalay.
Sa interview sang Bombo Radyo Bacolod kay Toboso Councilor Richard Jaojoco, nagtawag sa iya si 79th IB Commander Lt Col. Arnel Calaoagan nga nagakumpirmar nga clear na ang area kag mahimo na nga makabalik ang pumuluyo.
Madumduman nga nakasumpong sang militar ang ginabanta pito ka remnants sang dismantled Northern Negros Front sang New People’s Army.
Kun sa diin may-ara sang tatlo ka nasamaran sa bahin sang militar, samtang nakarecover naman sang mga armas, bala, personal nga pagkabutang kag mga subersibo nga dokumento nga may mataas nga intelligence value sa encounter site.
Ginpasalig naman kay Jaojoco nga nagpalagyo na sa malayo nga lugar ang mga rebelde.
Matapos ang tawag, nagdesisyon ang mga ini nga matapos na lamang sang panyaga ang masobra 300 ka mga evacuees.
Kaina sang aga, 87 ka indibidwal ang yara sa Amparado Elementary School sa Sitio Burgos samtang 236 ka indibidwal naman ang yara sa General Luna Elementary School Covered Court.
Kahapon, ang mga evacuees ang ginpalutuan man sang apat ka lechon nga baboy ni Toboso Mayor Madonna Jaojoco.
Suno sa konsehal, ginbatak naman ang Executive Order sa pagkanselar sang klase, gani bwas balik na ang klase sa duha ka buluthuan.
