Dako ang posibilidad nga sa evacuation centers magasaulog sang paskwa ang kadam-an sa mga evacuees sa paglupok sang Bulkan Kanlaon.
Sa interview sang Bombo Radyo Bacolod kay Police Captain Dennis Melgarejo, deputy chief of police sang La Castellana Municipal Police Station, ginapangabay man nga magkanay na ang sitwasyon sang bulkan agud makapauli ang mga evacuees sa ila tagsa ka balay sa tion sang Paskwa.
Apang samtang yara pa sa Alert Level 3, mataas gihapon ang risgo sa pag-alburuto sang bulkan gani gina-abiso ang pagpabilin sa evacuation centers.
Indi man makarisgo ang banwa sang La Castellana sa pagpabalik sa pumuluyo bangod inkaso liwat nga maglupok ang bulkan, liwat naman nga makaangkon sang kabudlayan sa evacuation efforts.
Napapanaog naman nila ang kadam-an sa mga kasapatan.
Sa karun, may pila pa lamang ka mga waterways nga makitaan sang paggray sang tubig bangod sa mud flow.
Apang agud makaseguro, may nagadeliver sang tubig sa pagpainom sa mga kasapatan.
Wala man sila makabatun sang complaint nga may nadulaan sang hinuptan nga sapat kag ang mga tag-iya ang dugay-dugay man nga nagabisita agud tsekyaron ang mga ini.
Suno kay Melgarejo, sa assessment, indi pagid mapanaog ang Alert Level 3 status sang bulkan, kag natapos naman ang ginpatuman nga forced evacuation sa mga nagapuyo sa 4 tubtob 6 km radius danger zone.
May mga medical personnel naman nga nakadeploy sa tagsa ka evacuation centers nga nagabulig sa pagseguro sa ikaayong lawas sang mga evacuees.
