Nakapauli na ang mga evacuees sa probinsya sang Negros Occidental nga nag-evacuate bangod sa bagyo Opong.
Madumduman nga 12 ka Local Government Units sa probinsya ang naapektohan sang baha kun sa diin 468 ka pamilya ukon 1644 ka indibidwal ang gin-evacuate.
Apat ka Brgy ang ginbaha sa ciudad sang Silay kag banwa sang Hinobaan, Isabela kag Pontevedra; anum sa banwa sang EB Magalona; napulo sa Talisay City kag banwa sang Hinigaran; 12 sa banwa sang Binalbagan; duha sa ciudad sang Bago kag La Carlota kag banwa sang La Castellana; kag isa sa banwa sang Manapla.
Sa interview sang Bombo Radyo Bacolod kay Negros Occidental Provincial Disaster Reduction Management Office Head Irene Bel Ploteña, wala sang problema nga nagluntad sa pagtinir sang mga evacuees sa evacuation center kag sila nagpauli naman sa ila tagsa ka balay.
Suno diri, dala nila sa pagpauli ang mga food packs nga ginpanagtag sang Department of Social Welfare and Development (DSWD).
Samtang, passable naman ang mga dalan nga natabonan sang balas kag mga kahoy.
Wala man sang reported nga missing, injured kag casualty.
