16 tanan ka mga barangay ang apektado sa ciudad sang Kabankalan bangod sa mga pagbaha.
Sa interiview sang Bombo Radyo kay Kabankalan City Mayor Benjie Miranda, nagdangat na sa 606 ka mga pamilya ukon masobra sa 3,000 ka mga indibidwal ang apektado sa ciudad.
Suno diri, kagabi, wala ini untat nga naglibot kag nag-assess sa mga residente nga dal-on sa mga evacuation centers.
Gilayon man nga ginhatagan ang mga evacuees sang pagkaon kag bulong.
Dugang pa sini, may yara sang nakahanda nga mga evacuation centers ang ciudad para sa tanan nga mga brgy apang kun ang designated evacuation center ang mapuno, ginasaylo na lamang sa mga buluthuan ang mga evacuees.
Pahayag sang alkalde, basta may yara sang bagyo ukon Low Pressure nagapanguna nga nagaka-apektohan ang ciudad bangod diri naga-ilig ang tubig sa mga suba naggikan sa iban nga areas kaangay sang Candoni, Cauayan, Ilog, Himamaylan kag iban pa.
Ginatinguhaan naman sini nga masolusyonan ang ini nga problema agud nga mahagan-hagan ang pagbaha.
Sa karun, amat-amat naman nga nagsubside ang tubig apang wala pa ginpahanugotan nga makapauli ang mga evacuees.
Samtang, naka-alerto ang Kabankalan City Police Station sa pagresponde kag pagbulig sa mga residente sang ciudad sang Kabankalan bangod sa padayon nga pag-ulan.
Sa interview sang Bombo Radyo kay Police Lt.Col Roberto Indiape, hepe sang Kabankalan City Police Station, bangod sa wala untat nga pag-ulan nagsaka ang lebel sang tubig kag iban sa mga residente ang nag-evacuate.
Suno diri, padayon ang trabaho sang kapulisan samtang may naka-standby nga personnel sa evacuation centers kasubong man nga may yara sang naga-upod sa City Disaster Risk Reduction & Management Office (CDRRMO) sa pagmonitor sa mga affected areas.
Naga-upod man ang kapulisan sa pag-evacuate sa mga residente agud nga mas madasig ang pagrescue.
Ginpasalamatan man ni Indiape nga nagakooperar ang mga residente sa pagpa-evacuate sa ila.
Samtang, bisan ang estasyon sang Kabankalan City Police ang ginbaha man sa ugsaran nga bahin kun sa diin nagdangat tubtob sa tuhod ang tubig.
