Gindumdom sang mga Filipino sa Israel ang mga napatay nga mga Overseas Filipino Workers sa nasambit nga pungsod matapos ang pagpang-atake sang Hamas militants sa Israel sadtong October 7, 2023 apang wala sang aktibidad bangud sa delikado nga sitwasyon.
Sa interview sang Bombo Radyo Bacolod kay Bombo International Correspondent Lina Diamante, direkta sa pungsod Israel, isa na katuig ang nakaligad sang natabo ang pag-atake sang Hamas sa Israel kun sa diin apat ka mga Filipino ang napatay.
Ini ang ginlakipan nanday Angelyn Aguirre, Loreta Alacre, Grace Cabrera kag Paul Vincent Castelvi.
Suno kay Diamante, ang Filipino organization sa Israel ang nagadumdom sa kamatayon sang apat ka mga Filipino sa ginpatigayon nga surprise attack sa Israel.
Madumduman nga isa sa napatay amo ang Bombo International News Correspondent sang Bombo Radyo Bacolod si Loreta ukon Lorie Alacre ang napatay sa surprise attack matapos nga ini kag ang iya Chinese boyfriend ang nagpadulong sa Ashkelon isa ka ciudad sa Israel kun sa diin ginpatigayon ang isa ka music event.
Suno diri, Sabado sang napatay si Alacre apang Miyerkules na sang nasapwan ang bangkay sini.
Ginpahayag man sini nga wala sila sang aktibidad subong bangud nga nagapanago sila sa tion nga maghuni ang siren.
Ang paghuni sang siren ang nagapahayag nga may yara sang mga ginpalupad nga mga rockets.
Suno kay Diamante wala sila nagagwa kun wala man sang importante nga kadtuan kag nagalikaw man sila mga matawo nga lugar bangud hinali lang may nagapangtiro nga wala sang rason.
