Ginpasiguro sang isa ka Filipino sa Israel nga maayo ang ila nga kahimtangan apisar sang pagpaulan sang Lebanon sang rockets sa norte nga bahin sang pungsod kun sa diin ini nagapuyo sa karun.
Sa interview sang Bombo Radyo Bacolod kay Cristina Fernandez, Bombo International News Correspondent sa Israel, maayo man ang sitwasyon nila sa karun sa Israel kag wala man sang reported nga nasamaran ukon napatay bangud sa rocket.
Suno kay Fernandez, may mga bomb shelter man ang ila nga ginapuy-an gani sa tagsa maghuni ang siren ukon may impormasyon nga nagpalupad sang rocket nagasulod ang mga ini sa bomb shelter.
Nagmapping naman ang Philippine Embassy kag Department of Migrant Workers (DMW) kun sa diin ginkuha ang impormasyon sang mga Overseas Filipino Workers (OFW) agud nga kun may evacuation madasig ang mga ini matrace.
Sa karun wala pa man sang abiso nga kinahanglan na ang mga ini nga mag-evacuate sa nasambit nga pungsod.
Suno kay Fernandez, nagapadayon nga ubra kag negosyo apang limitado ang pagtipon-tipon sa gwa kag sulod sang mga buildings.
Liwat man sini nga ginpasiguro nga hilway ang mga ini kag wala sang dapat kabalak-an ang ila pamilya diri sa Pilipinas.
