Apisar sang pagpamahog sang isa ka full-blown nga gyera, madamo sang mga Filipino migrant workers ang mas ginapili nga magpabilin sa Lebanon bangud sa pagpati nga ang pagpang-atake sang Israel ang mangin isolated lamang sa area sang Hezbollah.
Suno kay Beirut-based Mie Romagos, siya kag madamo pa nga OFWs ang nagdesisyon nga i-forego ang offer sang gobyerno sang Pilipinas nga pabalikon ang mga ini sa pungsod.
Sa kapin 10,000 ka Filipino sa Lebanon, kapin 1,500 ang nag-avail sang repatriation offer suno sa Department of Foreign Affairs (DFA).
Nagapati ang mga Filipino sa Lebanon nga kalabanan sa airstrikes sang Israel ang nagatarget sa sur nga bahin sang Lebanon kun sa diin ginaalegar nakabase ang kalabanan nga miyembro sang Hezbollah.
Suno sa mga otoridad sa Lebanon, 558 ka mga persona ang nagkalamatay sa Israeli strikes kun sa diin 50 ang mga kabataan.
Ginamonitor naman sang Filipino community leaders sa Lebanon ang warnings sang Israel agud ila maalerto ang mga OFWs nga posible naapektuhan sang airstrike.
