Nagdangat sa 81 ka pamilya ang apektado sa nagluntad nga sunog sa 16th street, Purok Magnolia, Barangay 7, Bacolod City.
Sa interview sang Bombo Radyo kay Punong Barngay Hercy Sibug, temporaryo nga yara subong ang mga evacuees sa Andres Bonifacio Senior High School sa Barangay 3.
Suno kay Sibug, may nagpadala naman sang bulig kaangay sang hot soup, tinapay, tubig kag mga gamit pantulog.
Hingyo sini sa mga pumuluyo sang Barangay 7 nga maghalong kag tsekyaron gid ang mga appliances sa tagsa ka panimalay agud malikawan ang kaangay nga insidente.
Samtang, nagapanawagan man ang Punong Barangay sang bulig kaangay sang bayo kag dugang nga mga kinahanglanon para sa mga evacuees.
Yara sa Andres Bonifacio Senior High School ang mga biktima sang sunog sa Purok Magnolia, Barangay 7, Bacolod City.
Kahapon, 30 ka balay ang gintupok sang kalayo sa nagluntad nga sunog kahapon sang aga, Mayo 12.
Sa interview sang Bombo Radyo Bacolod kay Jean Carmela Dato-on Rojo, Bombo Correspondent kag drama talent nga isa sa mga nasunugan, nagapasalamat ini nga wala sang may nasamaran sa iya nga pamilya apisar nga gintupok sang kalayo ang ila nga balay.
Suno kay Rojo, nasalbar sang mga ini ang iban nila nga mga papeles.
Dugang pa sini apisar nga wala pagid matumod ang ginhalin sang kalayo nga nagtuga sang sunog ginalantaw sang mga ini nga ang rason sang madasig nga pagdako sang kalayo ang paglupok sang gas tank.
Gani ginhingagaw sang iya mga utod safety ang mga gas tank sa ila balay.
May yara naman sang pagkaon nga ginhatag ang opisina ni Bacolod City Lone District Congressman Alfredo “Albee” Benitez kag ang Bacolod City Government.
Nagapanawagan man ini sang bulig bangud kinahanglan sang mga ini ang mga bayo kag iban pa nga kinahanglan.
