Wala pa nakasugod sa pagtukod sang mga stalls ang mga magabaligya sang palupok kag fireworks sa likod sang Pope John Paul II tower sa reclamation area.
Sa interview sang Bombo Radyo Bacolod kay Erbin Agramon, 62 sila nga mga firecracker vendors ang natalana nga magpwesto sa area.
Apang sila ang wala pa makasugod bangod gintambakan sang balas sang tag-iya sang duta ang pwesto.
Bangod Disyembre man lang sila makabaligya, nag-ayo sila sa tag-iya nga liwat makapwesto sa lugar, nga nagsugot man sa baylo ang mga firecracker vendors na ang magatapan sang gabukid nga balas.
Wala naman sila nagpangayo pa sang assistance sa ciudad bangod ini ang madugayan pa, sa baylo, ang 62 ka mga firecracker vendors ang nag-amot amot agud mabayaran ang back hoe nga nag-umpisa sa pagtapan sang area kahapon.
Tubtob lamang subong nga adlaw ang ila arkila sa back hoe nga nagasukot sang P2,000 kada oras ukon kabug-usan nga P32,000 sa duha ka adlaw nga tig-walo ka oras nga operasyon.
Bwas suguran naman nila ang pagtukod sang ila nga stalls, nga ila man ipatsekyar sa Bureau of Fire Protection.
P50,000 naman ang ila bayad para sa pagrenta nga tulungaon man sang mga firecracker vendors.
Apisar sa inisyal nga gasto, nagalaom si Agramon nga sila ang makabawi sa benta.
Pangabay lamang sini nga mangin maayo ang tiyempo partikular na sa pagsugata sang Bag-ong Tuig.
Mahimo nga mapatemprano na ang ila pagplastar sang baligya sa masunod nga tuig, apang sila ang magapangita pa sang bag-o nga pwesto.
