Gin-athag ni Executive Assistant to the Mayor Ernie Pineda nga pwede makapadayon sa pagtrabaho ang kapin 600 ka mga food delivery riders nga nagpaidalom sa surveillance testing sa BAYS center subong nga adlaw.
Sa interview sang Bombo Radyo Bacolod kay Pineda, ginpahayag sini nga pool testing ang pamaagi sa pagtest sa mga food delivery riders gani nagakahulugan nga sarang sila makapadayon sa pagtabaho pagkatapos sang swab testing sa ila apang kun maggwa ang resulta nga positibo ang mga ini sa coronavirus, diri na kag iextract sila kag dal-on sa quarantine facility.
Paathag ni Pineda nga may yara sang tatlo ka sahi sang testing.
Una amo ang kun symptomatic ang isa ka tawo kag boluntaryo ini nga nagpa-check up kag nagpa-swab test; ikaduha amo ang closed-contact sang nagpositibo ukon kabahin sang contact tracing kag ikatatlo amo ang pool testing.
Suno kay Pineda, kun indi pag-itest ang sektor sang mga food delivery riders, mas mabudlayan na sa ulihi bangud nga padayon man sila sa gihapon sa pagtrabaho.
Mas maayo nalang suno sa iya kun iswab test sila bangud macontain dayon ang virus.
Ginpasalig naman sini nga nakahanda na ang food packs nga ipanagtag sang ciudad para sa pamilya sang magpositibo.
Nahibaluan nga magluwas sa kabug-usan nga 579 ka mga food delivery riders nagikan sa 10 ka food delivery companies sa Bacolod, nagpaidalom man sa surveillance testing ang mga llamador sa bulangan sa ciudad.
Ang mga food delivery riders nga nakatapos na sa swab testing ang pagahatagan sang sticker nga compliant sila sa testing.
