Liwat naman nga gintarget sang Estados Unidos kag Israeli Military Forces ang mga fuel depots sang Iran kahapon matapos ang pila ka mga makusog nga lupok kag nagluntad ang isa ka sunog sa ciudad sang Tehran.
Suno sa Israeli military, ang pagpamomba sa mga oil storage facilities sang Iran ang kabahin sang ginatawag nila nga “next phase of war” bangud isa ini sa mga nagasuplay sang krudo sa mga pwersa militar sang Iran, nga sa baylo nangin rason nga dugang nga makahalit sa imprastraktura militar sang pungsod.
Antes sini, ginpuntirya man sang Israel ang madamo nga mga oil storage facilities sang Iran sang Marso 7.
Kasunod ini sang pahayag ni Presidente Donald Trump sang Estados Unidos nga nagapangayo sang ‘unconditional surrender’ gikan sa gobyerno sang Iran kag nagasiling nga ang tensyon sa tunga sang mga pungsod ang matapos lamang kun maga-surender na ang Iran ukon tubtob nga indi na mag-operate ang pwersa militar sini.
Samtang, madumduman nga una na nga nagpangayo sang pasaylo ang Iranian President nga si Masoud Pezehkian sa iya kaingod nga pungsod nga kabahin sang Gulf States bangud sa serye sang missile attacks.
Suno diri, mas maayo nga indi magpasakop ukon mangin “hampanganan” sang imperyalismo sang Estados Unidos ang mga pungsod sa Gulpo kag mangin galamiton sa pagpuntirya sang ila mga teritoryo.
Samtang, pagkatapos sini, gin-anunsyar ni Top Iranian Official Ali Larijani nga ang Estados Unidos ang magabayad sa ila mga pagpang-atake.
