Kumpiskaron na ang mga furniture nga ginadisplay sa karsada mismo sa Dalan Lopez Jaena diri sa ciudad sang Bacolod kun padayon nga magpasaway ang mga furnituremakers nga nagaresulta sa paggutok sang dalagan sang trapiko sa lugar.
Sa interview sang Bombo Radyo kay Rey Demisana, team leader sang Bacolod City Legal Enforcement Team, ginatutukan nila sa karon ang Dalan Lopez Jaena bangud magutok ang traffic diri adlaw-adlaw bangud sa mga nagapwesto sang baligya sa dalan.
Ginapanilagan man nila ang dalagan sang trapiko diri halin Biyernes tubtub Domingo apang bisan ano ka saway sa mga nagabaligya, nagalaksam gihapon ang mga ini sa dalan.
Suno kay Demisana, kun indi pa gid matadlong ang mga furniture-makers subong nga semana, magahingyo ini sang permiso nagikan sa City Legal Officer nga magaresort na sila sa confiscation.
Suno sa iya, madamo na gid nga reklamo ang ila nabaton angot sa kagutok sang dalagan sang trapiko sa lugar bangud may mga furniture nga nagatungtong sa dalan.
Panindugan ni Demisana, indi dapat maglapaw sa shoulder sang dalan ang mga display nga furniture kag indi magpinagusto ang mga natungdan bangud wala sang klase.
Gin-athag man niya nga gina-apply nila ang pagsulundan sa tanan kag wala sang pinilian bangud tanan man lang ang nagalapaw sa dalan.
Kun indi magpamati ang mga furnituremakers suno sa iya kag maghatag sang pahanugot ang CLO, magadala sila sang dumptruck nga amo ang kargahan sang mga ginconfiscate nga baligya.
