Nagpatawag sang media ang isa ka complainant matapos nga gina-alegar gin-demolish ang gina-estaran sang iya nga kaparyentihan sa Purok Nagahili-ugyon, Barangay Tangub, Bacolod City apisar nga wala sang napakita nga court order ukon dokumento ang nagapahayag nga tag-iya sang duta.
Suno kay Baltazar Lamata, 30 ka tuig na nga nagapuyo sa lugar ang iya nga paryente nga ginkilala lang nga si Jolinda.
Apang alas-9:00 tubtob alas-10:00 sang aga kahapon, ginpatigayon ang demolition kun sa diin yara man ang presensya sang barangay secretary.
Gilayon nga nagpangita sang media si Lamata bangod sa kahangawa nga may magluntad nga kinagamo.
Paathag sini nga wala sang ginpakita nga papelis ang mga nagdemolish sa lugar kag wala man nakighinun-anon sa mga residente kundi hinali nalang nga ginpadal-an sang mga tawo agud nga panggub-on ang mga pamalay kalakip na ang apat ka bloke.
Suno kay Lamata, willing sila nga magbatun kun ila makita ang papelis nga ginapanag-ihayan ang duta kasubong man kun may ipakita nga court order nga nagapahanugot sa demolition.
Dugang pa sini nga wala man lang sila sang nabatun bisan abiso nga maghalin na bangod idemolish ang lugar kag wala man ginhatagan tion nga makasaylo ang mga pumuluyo.
Apang suno sa complainant, sa pagbalik sini gikan sa pagpangita sang media, nahibaluan nalang niya nga gindala na sa Bacolod Police Station 8 ang iya nga paryente nga si Jolinda.
Nahibaluan nga nagbato sa mga nagapang demolish si Jolinda pinaagi sa paghampak sang bato, apang wala man sang naigo.
Reklamo ni Lamata kun ngaa ang iya paryente lang amo ang gindala sa prisuhan apang indi ang mga nagdemolish nga wala sang nagakaigo nga dokumento. SAMTANG… gin-athag sang Punong Barangay sa Tangub, Bacolod City nga madugay na ang estoryahanay sa tunga sang tag-iya sang duta kag mga naga-occupy sa gindemolish nga mga pamalay kag bloke kahapon sa Purok Nagahili-ugyon kag sa atubang lang sang Barangay Hall.
Suno kay Punong Barangay Noli Villarosa, ang Barangay ang nag-assist lang sa complaint sang tag-iya sang duta kag ini ang nagpakita man sang original copy sang titulo kag kontrata nga nakapangalan sa Negros Eastwoods Properties Incorporated.
Suno kay Villarosa, makapila na ka beses nga ginpatawag sang abogado sang tag-iya sang duta ang mga residente sa nakaligad nga tinuig apang wala ang mga ini nagasapak.
Ginkadtuan naman ang mga ini sadto sang Judge apang ila pa nga ginbastos suno sa Punong Barangay.
Panindugan ni Villarosa nga papel kuntani sang Barangay nga magpatunga kag magwitness sa kasugtanan sa duha ka partido apang wala man nagapalapit sa ila bisan ipatawag ang mga informal settler.
Paathag sang Punong Barangay nga indi man rehistrado nga residente sa Barangay Tangub ang mga naga-estar sa gindemolish nga duta.
Suno kay Villarosa, ang tag-iya sang duta ang gikan sa America kag bag-o lang nakabalik nga gilayon nga nagdangop sa iya opisina kaupod sa bata sini nga abogado agud diskusyunan ang pagpademolish sang duta.
Ini bangod lain ang naga-arkila sa tag-iya sang duta apang lain man ang nagapuyo gani kaangay nga lain ang nagabinipisyo kadungan pa nga ang nagapuyo sa lugar ang nagaclaim nga ila ang duta.
Nagtuga naman ini agud ma-iritar ang tag-iya kag ginbawi ang duta agud personal sini nga mapuslan.
Dugang pa ni Villarosa, tatlo ka tuig na nga gin-untat sang tag-iya ang pagbatun sang arkila bangod luyag na sini nga maghalin ang mga okopante.
