Kadungan sang kalipay kag kakulba, pangamuyo naman ang mahatag nga suporta sang iloy ni Rogen Ladon kadungan sang iya hampang sa Mayo 22 sang hapon.
Sa interview sang Bombo Radyo kay Mrs. Joy Ladon direkta sa ila balay sa Barangay Lag-asan, Bago City, Negros Occidental, nagpanugyan ini kay Rogen nga magfocus kag isalig sa Ginuo ang iya hampang.
Wala nagalantaw si Mrs. Ladon sa hampang ni Rogen bangud nakulbaan ini kag nasakitan sa tion nga makit-an nga maigo sang sumbag ang iya bata, apang samtang wala nagalantaw, nagapangamuyo si Mrs. Ladon para sa safety kag kadalag-an sang iya bata.
Suno diri, nagalantaw lang ini sa replay sang hampang kun daog na ang boksidor.
Samtang ang iya bana naman nga si Domingo ang nagatutok gid sa hampang ni Rogen.
Suno sa iloy, wala siya nagalagas sa premyo sang iya bata kundi sa dungog nga mahatag sini sa Pilipinas.
Suno diri, mahimo nga sa kalolohan ni Rogen nakuha ang iya hilig sa pagboksing bangud ang amay ni Mr. kag Mrs. Ladon ang mahuyugon sa boksing.
Elementarya pa lang, nakit-an na sang mag-asawa ang huyog sang bata sa boksing.
Una nga nadiskubrehan sang ABAP ang magulang nga si Jogen kun sa diin nakakadto sa ila balay ang pila ka boxing coaches kag ginhaylo ini nga magsulod sa nasambit nga sports.
Madamo naman sang napundar si Rogen bangud sa iya mga premyo sa pagboksing kun sa diin napatindugan niya na sang balay ang iya ginikanan kag nakabakal naman ini sang lote sa subdivision.
Suno sa amay sini nga si Domingo Ladon, may huyog man ini sa bisan ano lang nga sports sadto gani suportado sini si Rogen sa iya career.
Nagatutok naman ang amay nga Ladon sa live nga hampang ni Rogen kag tuman ang kalipay sini nga nagafocus ang boksidor sa iya career.
