Indi pa mapat-ud sang mga gobernador sa Western Visayas kun san-o mabatak ang pagahold in abeyance sang Region 6 sa Resolution 101 sang National Inter-Agency Task Force on the Management of Emerging Infectious Diseases nga nagapatuman sang uniform travel protocol.
Sa idalom sang travel protocol, indi na magswab test ang byahero magluwas lang kun irequire sang LGU of destination, wala na sang travel authority kag wala naman sang quarantine.
Sa Zoom interview sang Bombo Radyo Western Visayas sa mga gobernador sa Region 6, ginkumpirmar nanday Negros Occidental Governor Eugenio Jose Lacson, Iloilo Governor Toto Defensor, kag Capiz Governor Nonoy Contreras nga indi pa masunod ang Resolution 101, magluwas lamang sa Antique nga nagasunod na subong sa uniform travel protocol.
Suno kay Lacson, ang mga byahero nga magaabot sa airport kag sa BREDCO port ang nagapaidalom sa swab test kag ini ang libre bangud provincial govermment ang nagabayad.
Madali man suno sa iya ang paggwa sang RT-PCR test result bangud may kaugalingon nga molecular laboratory ang probinsya.
Sa tion nga negative ang test result, sarang naman makapauli ang returning resident.
Panindugan sang gobernador, kinahanglan nga maghalong ang probinsya agud indi na magbalik ang local transmission, subong nga manubo na ang COVID cases kada adlaw.
Suno naman kay Bacolod City Mayor Evelio Leonardia, nagasunod ang Bacolod sa nakasugtan sang Regional Inter-Agency Task Force nga status quo sa travel protocol.
Suno kay Leonardia, returning residents ang kalabanan nga new infections sa Bacolod bangud wala na sang local cases.
Kinahanglan man nga panilagan ang sitwasyon sa Metro Manila suno sa alkalde bangud nagasaka naman ang kaso sa National Capital Region nga isa ka patimaan nga dapat ireconsider ang mas halog nga requirements.
