Luyag sang lider sang isa ka dance group nga partisipante sa Handog ng Bombo Radyo kag Star FM sa Masskara Festival – Dance Showdown Competition nga mapalapta ang pangalan sang ila grupo sa nagkalain-lain nga bahin sang pungsod.
Sa interview sang Bombo Radyo kay Vincent Mateo, lider sang dance group nga Obsequious Negros, may yara sila sang idol nga Obsequious seniors sa Manila nga madamo naman sang napasakupan nga mga contest indi lamang pang-national apang ini nakalab-ot pa sa international stage.
Suno diri, nakaligad nga tuig sang gintukod ang Obsequious group diri sa Negros kag ini ginhingadlan bilang Obsequious Negros.
Orihinal nga ginalakipan sang siyam ka mga miyembro ang grupo kun sa diin isa lamang diri ang babayi apang bangod sa trabaho kag pag-eskwela nag-amat- amat nga nagalain-lain ang miyembro sang grupo.
Sa karun, lunsay na lalaki ang miyembro sang grupo kag suno kay Mateo, padayon sila nagabaton sa kun sin-o man ang luyag nga makigbahin sa Obsequious Negros.
Pahayag ni Mateo, importante sa tanan ang passion kag dedikasyon sa pagsaot.
Ini bisan sa trabaho ukon buluthuan man may yara sang tsansa nga makaperform kag makapakita sang talento.
Gina-agda ni Mateo ang tanan nga maglantaw sa nagkinalain-lain nga mga talento sang mga kabataan.
Ang Handog ng Bombo Radyo kag Star FM sa Masskara Festival- Dance Showdown Competition patigayunon sa Bacolod City Public Plaza sa Oktubre 20, alas 6:00 sang gab-i. Samtang, preparado na ang dance group nga V-Fresh nga magpasundayag sa Handog ng Bombo Radyo kag Star FM sa Masskara Festival – Dance Showdown Competition sa Bacolod Public Plaza sa Biyernes sang gab-i.
Suno sa adviser sang grupo nga si Liezl Lambayong, Math teacher ini apang passion niya ang pagsaot.
Ang grupo ang nagikan sa Dr. Vicente F. Gustilo Memorial National High School, isa ka public school sa ciudad sang Cadiz kun sa diin ang mga dancers ang nagikan sa nagkalain-lain nga grade level sa junior kag senior high school gani sila ang ginbansagan nga fresh.
12 tanan ka mga dancers ang nagabug-os sa V-Fresh.
Suno kay Lambayong, nahibaluan nila ang kompetisyon paagi sa announcement sa Facebook page sang Bombo Radyo gani bangud fresh group ang V-Fresh, nakahanda gid ang mga kabataan nga magcompete.
Suno diri, nanamian sila sa kompetisyon bangud indi sila magpauli nga luhaan bangud may yara gihapon sang premyo.
Bilang preparasyon, nagapractice ang mga dancers kun matapos ang klase kun hapon agud nga matanyag sa mga tumalan-aw ang maayo nga performance.
Nagpangagda naman ini sa mga taga-Bacolod kag sa tanan nga mga tumalan-aw sa Bacolod Public Plaza nga sila ang suportahan.
