Gin-athag ni Senate President Francis “Chiz” Escudero nga wala sa lista sang priority legislations ang hagna nga pasakaan ang daily minimum wage sang mga mamumugon.
P200 nga wage hike ang nakabutang sa hagna nga gin-aprubahan sang Kamara samtang P100 naman ang iya sang Senado.
Suno kay Escudero, ang P200 across the board nga ginpasar sang mga kongresista sa ulihi nga semana sang sesyon ang wala nakabutang sa Legislative-Executive Development Advisory Council (LEDAC).
Ang LEDAC nga ginabug-usan sang cabinet secretaries kag Senate and House leaders amo ang nagaplastar sang economic policies sang administration nga amo ang ginahimo nga layi.
Gindugang sini nga may matabo nga bicameral conference kun mabaton na sang Senado ang kopya sang House bill nga ginpasar sa third and final reading sang Myerkules, Hunyo 4. Apang pahayag sini, indi klaro kun adoptaron sang Senado ang version sang Kamara ukon magakompromiso sila sa amount agud indi maapektuhan ang ekonomiya.
