Madasig nga nagkoordinar ang Office of the Civil Defense – Negros Island Region sa mga ahensya sang gobyerno para sa pagpadala sang heavy equipments sa road clearing sang lutak nga dala sang lahar flow sa Sitio Tamburong, Barangay Biak na Bato, La Castellana, Negros Occidental.
Sa interview sang Bombo Radyo Bacolod kay OCD NIR Director Donato Sermeno III, alas-11:55 palang sang gab-i nabatun na nila ang report nga may nagluntad nga lahar flow.
Sang aga, gilayon man sila nga nagpakig-angot sa Department of Public Works and Highways para sa pagpadala sang heavy equipments para sa clearing operations.
Nagdangat naman sa 100 ka metros ang kalabaon sang dalan nga naapektuhan sang lahar.
Ini ang ikaduha na nga Lahar Flow sa lugar bangod natabo naman ini sang Hunyo tinalikdan nga tuig.
Padayun man ang monitoring sang OCD kaupod sa La Castellana Municipal Disaster Risk Reduction and Management Office.
Pahayag ni Sermeno nga sila ang nagabantay bangod indi mapaktan ang sitwasyon sa tion sang mga pag-ulan.
Suno diri kapin isa ka tapak ang kadalumon sang lahar.
Samtang nag-abiso naman ini nga siraduhan ang dalan, kag magpatigayon nalang sang rerouting samtang nagapadayun ang clearing operation.
