Ginkumpirmar sang mga himata sang magtiyo nga ginpatay sa Sitio Upper Ikugan, Barangay Minapasuk, Calatrava nga sila ang gintayaan sang pito ka mga armado nga lalaki nga nagpaandam nga ila ginapatay ang mga may link sa Philippine Army.
Madumduman nga padulong kuntani ang Calatrava Municipal Police Station upod sa mga opisyales sa Barangay Minapasuk kag Municipal Disaster Risk Reduction and Management Office (MDRRMO) agud kumpirmahon ang report natuhoy sa shooting incident kag pagpatay kanday Felix “Diotay” Resutai kag sa hinablos sini nga si Elisio Resutai alas-5:00 kahapon sang aga, antes pa sang mga ini naka-engkwentro ang rebelde nga grupo sa Sitio Kalanugan sa nasambitan nga Barangay kapin alas-10:00 sang aga.
Sa interview sang Bombo Radyo Bacolod kay Ruden Resutai, 30 anyos kag bata ni Felix Resutai, nagpanuktok sa ila balay ang pakaisa sini nga si Elisio upod ang pito ka mga armado nga lalaki kahapon sang aga.
Gilayon naman sila nga gintayaan sang armas-luthang, ginpatalikod kag ginpaluhod.
Suno kay Ruden, tatlo sila ang magkaupod sa balay sang iya amay kag live-in partner sini nga si Mercedita Zamora.
Dugang pa ni Ruden nag sila sang iya nga step mother ang ginpalukpan man sang mga armado sa atubang antes paman nagpalupok sa iya amay kag tiyo.
Lunsay nag-angkon sang igo sang bala sa ulo ang magtiyo samtang siya kag ang step mother ang wala naman gintandog.
Antes magbiya sa lugar nagpahanumdom pa ang mga armado kay Ruden nga indi magsunod sa iya amay nga isa ka intelligence personnel sang Philippine Army, bangod ila ang mga ini nga ginapatay.
Nagpaandam man ang mga ini nga sila ang magabalik pa sa lugar bangod may-ara pa sang dugang nga pagapatyon.
Aminado naman si Ruden nga sa 30 anyos niya sa kalibutan, pagpanguma lamang ang palangabuhian sang amay kag wala man ini sang ideya nga ini ang nagsulod sa simbahan.
Sa pihak nga bahin, ginpanindugan naman ni Mercedita Zamora nga sa tatlo nila ka tuig nga pag-updanay ni Felix Resutai, wala man ini sang may nahibaluan nga may kaaway ang kahagugma.
Suno diri, sila ang ginrekisa pa sang mga armado kag wala man sang may nasapwan nga armas luthang sa ila nga paghinakop.
Pahayag sini nga mga long fire arms ang bitbit sang mga gina-alegar NPA.
Ang bangkay sang magtiyo nga lunsay nag-agom sang igo sang bala sa ulo ang ginpapanaog na sa banwa kahapon.
