Indi kumporme ang mga hog raisers sa ginpagwa nga recommended retail price sang piglets ukon idik sang Negros Occidental Provincial Government nga P2,700.
Sa interview sang Bombo Radyo Bacolod kay Alliance of Hog Raisers Association of Negros Occidental (AHRANO) President Pastor Ric Lauron, ginapinsar na lamang sang mga kaupdanan sini nga mahimo nga typographical error lamang ang natype nga amount sa Executive Order nga ginpagwa ni Negros Occidental Governor Eugenio Jose “Bong” Lacson, bangod suno diri tuman ka barato sang P2,700.
Sa pihak sini, ginapasalamatan niya ang gobernador sa pag-address sa problema sang hog raisers.
Apang suno sa iya antes ang pagsulod sang African Swine Fever kag Hog Cholera, ang presyo sang piglets ang yara sa maximum nga P5,000.
Para sa ila ang fair price ang kuntani yara sa P3,500 tubtob P4,000 para sa standard na nga 10 kilos, agud sila ang may gamay man nga ginansya.
Pahanumdom niya nga nakadepende pa sa kadamuon sang bata sang nayon ang ginansya bangod kun yara lamang sa lima tubtob anom ang bata, mapatas lamang ang gastos sa ila ginarekomendar nga presyo, kag maka-ginansya lamang kun yara na sa kapin 10 ang mga baktin.
Dugang pa ni Lauron nga wala man nagabarato ang presyo sang feeds, nga nagadangat na sa P2,000 ang kada sako.
Suno kay Lauron, ginalobby pa nila sa gobyerno nga kun mahimo maregulate ang presyo sang feeds agud indi matam-an ang mga hog raisers.
Barato man suno diri ang recommended nga presyo sa live weight nga P165 kada kilo.
Ginarekomendar nila nga kuntani ini ang mapasaka sa P175 tubtob P180.
Ini bangod gamay ka tama ang ginansya sa ginrekomendar nga presyo sang probinsya, kag maresto pa ang hog raisers kun dako ang additional cost kaangay sa pagtransport sang produkto padulong sa merkado.
Apang aminado si Lauron nga maayo nalang ang ginrekomendar nga presyo sangsa karun nga yara na sa P130 ang kada kilo sang live weight.
