Nagahulat gihapon ang mga hog raisers sa Negros Occidental nga nahalitan sang pagduging sang African Swone Fever (ASF) kag Hog Cholera, sa ginpromisa sa ila nga financial assistance gikan sa Region.
Sa interview sang Bombo Radyo Bacolod kay Ric Lauron, presidente sa Alliance of Hog Raisers Association of Negros Occidental (AHRANO), sila sa ciudad sang Himamaylan ang nakabatun na sang financial assistance gikan sa City government.
Sa pagkahibalo sini, P2,000 ang igahatag nga cash assistance sa kada household nga apektado santo sa nakaligad nga mga statements ni Negros Occidental Governor Eugenio Jose “Bong” Lacson.
Apang sang naga-inquire, nakabatun ini sang impormasyon nga Department of Social Welfare and Development (DSWD) ang incharge sa distribution.
Paathag ni Lauron nga preparado na ang tanan nga listahan, apang madamo pa sang mga requirements nga ginakinahanglan antes madownload kag mapanagtag ang pondo, kag wala ini sang ihibalo kun diin na kutob ang ahensya.
Ang distribution ang igahatag naman per household, gani bisan madamo nga mga individual hog raisers apang nagapuyo sa isa lang ka balay, sila ang magabatun lamang sang P2,000.
Sa pihak nga bahin, yara na ang mga hog raisers sa probinsya sa dereksyon sang pagpadamo sa ginasagod nga baboy.
Suno kay Lauron, Enero nagsugod ang timeline sang Provincial Government sa sentinelling.
Sa karun, ginapanilagan pa kun may-ara sang mga magatuhaw nga kaso sang ASF, bangod aminado ang mga ini nga indi pa sila makarisgo sa pagsagod sang madamo nga baboy tubtob indi pa segurado nga wala na ang virus.
Kun wala na sang marecord nga kaso, didto na ang mga ini madouble production, agud ma-maximize ang supply sang baboy sa Negros Occidental.
Aminado naman ini nga bangod wala pagid makabangod sa supply, gani mahal ang presyuhanay sa merkado nga nagadangat sa P350 tubtob P380 ang kada kilo.
