Ginasuspetsuhan nga positibo sa African Swine Fever ang mga idik nga nagkalamatay sa Barangay Tangub, ciudad sang Bacolod subong nga bulan gani ginkuhaan sila sang sample agud nga mapaidalom sa test.
Ini matapos nga 18 ka mga idik ang nagkalamatay sa nasambit nga barangay kag lunsay sila nagabatyag sang sintomas sang African Swine Fever.
Suno kay Punong Barangay Noli Villarosa, sang Lunes, nagpadulong sa barangay hall ang tiayon sang isa ka hog raiser kag nagpahibalo nga sa 28 ka idik nga ila ginasagod, apat diri ang hinali lang nga napatay.
Pagka-Martes, duha pa gid ka idik ang napatay gani nagkuha na ang City Veterinary Office sang sample sa anom ka mga idik agud nga mapaidalom sa test.
Kaina sang aga, ginpahibalo si Villarosa sang City Veterinary Office nga suspected nga natapikan sang ASF virus ang mga idik kag igapaidalom sa culling ang nabilin nga 24 ka idik.
Suno sa punong barangay, baklon nalang sang barangay ang mga idik agud nga ilubong agud indi man mamierdihan ang hog raiser.
Suno kay Villarosa, 18 nagikan sa 35 ka idik ang nagkalamatay sa Purok Paghidaet samtang isa naman ka dako nga baboy ang napatay sa Purok Kasilingan.
Suno diri, magahatag ang barangay sang financial assistance sa mga apektado agud nga indi na nila pagtaguon ang matuod nga sitwasyon kun may baboy nga nagabatyag sang ASF symptoms.
Santo sa data, may yara sang nagasagod sang baboy sa 24 ka mga purok sa Barangay Tangub.
Bwas nga adlaw, may yara sang session ang Barangay Council sang Tangub kag sila ang magapain sang pondo para sa financial assistance sang mga hog raisers.
