Gin-isa isa ni former Department of Public Works and Highways (DPWH) Undersecretary Roberto Bernardo ang involvement kag nabatun nga kickbacks sang pila ka incumbent kag former members sang Senado.
Sa pagresume sang Senate Blue Ribbon Committee hearing angot sa anomalya sa flood control projects, liwat nga nag-atubang ang anay opisyal sang DPWH.
Suno kay Bernardo, si former Senate President Francis “Chiz” Escudero ang makapila ka beses nga nakabatun sang kickbacks gikan sa flood control project.
Ang commitment kay Escudero ang nagdangat sa 20 porsyento sa mga proyekto nga ginpatuman sa Valenzuela, Marinduque, Oriental Mindoro, kag Quezon City halin 2024 tubtob 2025.
Samtang sang 2023, si Senator Jinggoy Estrada ang nagrequest naman kay anay DPWH Secretary Manny Bonoan paagi sa iya sang proyekto nga balor P500 million para sa DPWH-NCR building nga ginlakip ni Undersecretary Cathy Cabral sa National Expenditure Program para sa 2024.
Ang Senador ang nakabatun sang commitment nga 18 porsyento.
Samtang personal man nga nakadeliver si Bernardo sang P125 million nga kickbacks kay former Senator Bong Revilla sang 2024.
Suno diri, ang kwarta ang gingamit ni Revilla sa iya Senatorial campaign sang 2025 midterm elections.
Dugang pa sini nga sang 3rd quarter sang 2024, ginpalapitan man ini sang staff ni former Senator Grace Poe kag ginpalihog nga ipahanumdom kay Bonoan ang pangabay sa pag-akumodar sang proyekto sang Senadora para sa NEP.
Suno kay Bernardo, ginpalab-ot sa iya ni Bonoan nga may naka-alukar nga P500 million para sa Senadora kag ginsugo siya nga magpangayo sang listahan sang mga proyekto.
Pahayag sini nga 20 porsyento ang nabatun nga commitment ni Poe.
