Padayon ang paglibot agud nga matsekyar kag macalibrate ang mga gas stations sa ciudad sang Bacolod agud masiguro nga wala sang may nagapanukot sang indi insakto.
Sa interview sang Bombo Radyo kay Councilor Kalaw Puentevella, chairman sang committee on energy, tanan ang nagbatyag kag nakita nga indi lahog-lahog ang gastohanay kag apektado gid sini ang plete ilabi na sa pagbukas sang klase.
Suno diri, padayon ang ila paglibot sa ciudad kag pagtsekyar sa mga gas stations agud icalibrate ini nga mahatag ang supesyente nga gasolina kag diesel kag wala sang nagapanukot sang indi insakto.
Sa una nga apat ka bulan subong nga tuig sa ila nga paglibot, 136 ka mga gas stations na ang ila nacalibrate.
Santo sa ila monitoring, wala sang may ginsaway, wala sang reklamo kag wala sang problema sa mga gas stations, indi kaangay sang nakaligad nga tuig nga madamo sang mga ginpang-islan nga mga nozzles nga may defect.
Pahayag ni Puentevella, pagatun-an sini ang fuel subsidy nga mahatag sa mga driver kag operator, kun ano bala ang maayo nga tikang agud indi matam-an ang transport group. Samtang, ginkakibot sang isa ka traditional jeepney driver sa Bacolod sang ini ang nagparefuel sang iya PUJ kag nakita ang dako nga pagsaka sa presyo sang produktong petrolyo.
Kaina sang aga, nagsaka sang P3.50 ang presyo sang diesel samtang nagsaka naman sang P2.10 ang presyo sang gasolina.
Sa interview sang Bombo Radyo kay Jombel Malunes, nga nagabyahe sang jeep nga may ruta Bata-Libertad, aminado ini nga maayo man ang byahe apang manubo ang income bangod nga wala sang klase kag diutay ang pasahero.
Suno diri, P500 tubtob P600 ang ila income sa isa ka adlaw apang kapin P1000 ang iya gasto sa diesel.
Mabudlay para kay Malunes ang iya pagbyahe apisar nga siya mismo ang nagapanag-iya sang unit, kun ikumparar sa mga nagaarkila lang.
Pahayag ni Malunes, ininto-anay ang lakat sang presyo sang produktong petrolyo bangud gamay ang rollback apang bigtime ang price hike.
Samtang, kumporme man ini sa pahayag ni committee on energy chairman Councilor Kalaw Puentevella nga tun-an ang paghatag sang fuel subsidy sa public utility jeepneys, apang indi man adlaw-adlaw ang paghatag sa ila sang fuel subsidy, kag dalagko nga operators lang man ang makaganar sini.
Nagapati man si Malunes nga indi dali-dali nga madula ang mga traditional jeepney sa dalanon bangod indi man magpasugot ang presidente nga magtuga ini sang problema sa pumuluyo.
