Ginkumpirmar ni Bacolod City Legal Officer Atty. Romeo Carlos Ting Jr. nga automatic nga ginterminate na sa trabaho ang mga Job Order Casual nga nagpositibo sa illegal drug use kasunod sang ginpatigayon nga surprised drug test.
Madumduman nga 49 ka mga Jos ang nagpositibo sa iligal nga droga sa Public Order and Safety Office (POSO) kag Bacolod Traffic Authority Office (BTAO) samtang may apat naman nga regular employees nga nagpositibo sa BTAO.
Suno kay Ting, bangod indi man opisyal nga empleyado sang City Government ang 49, sila ang gilayon naman nga ginpalos sa trabaho kag indi na mahatagan sang appointment.
Sa pihak nga bahin, ang apat naman ka mga Regular Employees ang ginpaidalum anay sa preventive suspension.
Ini bangod may-ara pa sang pagalabayan nga proseso antes mapahalin ang government employees santo sa pagsulundan sang Civil Service Commission.
Apang ginahatagan pa sang 15 ka adlaw ang mga empleyado sa pagchallenge sa resulta sang test apang sila na ang magagastos para sa confirmatory test.
Ang mga nagpositibo ang natalana naman nga ipaidalum sa rehabilitasyon.
Sa pihak nga bahin, gin-athag ni Ting nga sarang makapatuman sang drug test sa tion pa lamang sang hiring sang mga regular employees santo sa Section 36 sang Republic Act 9165 ukon Comprehensive Dangerous Drugs Act of 2002.
Madumduman nga una na nga nagvolunteer sa pagpaidalum sa drug test si Bacolod City Mayor Alfredo “Albee” Benitez, agud nga magserbe nga ihemplo, samtang kahapon, boluntaryo naman nga nagpadrug test kag nagnegatibo si former Councilor kag karun Consultant sa Traffic Management and Anti-Graft and Corruption Committee Patrick Lacson.
