Nagpanawagan ang director sang Department of Agriculture Region 6 sa mga local government units nga indi na pag-ipagwa pa sa pihak nga area ang karne sang baboy ukon processed products nagikan sa ila nga banwa ukon ciudad agud indi maglapta ang African Swine Fever.
Sa interview sang Bombo Radyo kay Engr. Albert Barrogo, importante nga butang nga nadeterminar nga yara na ang kaso sang ASF agud mahatagan ini sang nagakaangay nga tikang sang LGUs.
Nakapadala naman ini sang sulat sa mga LGUs para mangayo sang mga samples nga ipa-test agud makumpirmar kun positibo ukon negatibo sa ASF ang mga baboy.
Suno diri, makuha na ang result matapos ang isa ka oras kun naprocess na sang laboratory technicians, apang inisyal nga result lamang ang mahatag bangod nga kinahanglan ini sa gihapon ipadala sa Bureau of Animal Industry para sa confirmatory test kag BAI mismo ang magadeklarar kun Green, Pink, Yellow ukon Red zone na ang isa ka ciudad ukon banwa.
Sa karun nagahulat ini sang sabat gikan sa mga LGUs kun sila ang iallow nga magconduct sang surveillance sa area agud mahatagan sang tikang ang madaisg nga paglapta sang virus.
Samtang, nagapangayo si Barrogo sang bulig sa mga manugbakal sang baboy nga indi pagbaklon sang barato ang buhi nga baboy kag ibaligya sang mahal sa merkado, bangod nga makaluluoy ang mga hog raisers nga indi makaginansya.
Nagpanawagan man ini sa mga konsumidor nga kun positibo nga may kaso sang ASF, likawan na ang pagpagwa sang karne sang baboy ukon processed food sa ila nga lugar agud indi maglapta ang ASF virus.
