Ginahatagan sang akomodasyon sang isa ka grupo sa Bacolod City ang mga kabataan nga nadiagnose nga may autism.
Ini kadungan sa National Autism Consciousness Week nga ginasaulog kada ikatatlo nga semana sang Enero, kun sa diin ang Autism Society Philippines ang nagpatigayon na sang Nationwide Film showing sang Biyernes.
Sa interview sang Bombo Radyo Bacolod kay Wendy Arroyo, presidente sang Autism Society – Bacolod City Chapter, ang Autism Society Philippines ang 35 ka tuig na humalin sang gintukod, apang ini ang nakasulod sa Bacolod City sang 2018 lamang.
Si Arroyo ang may duha ka kabataan nga may lainlain nga kondisyon, samtang ang 18 anyos na sini nga bata ang diagnosed nga may autism.
2 anyos pa lamang nakita na nila nga ini ang indi maka-eye contact, hyper-active kag tuman kun magtantrums apang aminado ini nga kalabanan sa mga ginikanan ang may denial stage, ukon nagasalig pa sa “what ifs.”
Naglala ang kondisyon sang ila nata sang ini ang 4 anyos, kag sila ang mabudlayan na sa pagcontrol, kun sa diin sa pagpatsekyar natumod nga may autism.
Aminado ini nga mas maayo kuntani nga early interventions sa nasambitan nga kondisyon.
Nangin mas mabudlay pa ang iya sitwasyon sang mapatay ang iya bana sang edad 5 anyos pa lamang ang ila bata, kun sa diin ini ang wala nagkaon sang halos isa ka semana bangod naanad ini sa luto sang amay kag amo man ang nagapakaon sa iya.
Mabudlay man para kay Arroyo bilang single mom bangod sa Guimaras pa sila sadto nagapuyo kag nagatabok pa sa Iloilo nagapakunsulta.
Suno diri, kun may mga weather disturbances, kun kis-a nagalain ang routa sang barko, nga amo man ang tantrums sang bata bangod luyag sini nga sa orihinal nga routa gid maglabay.
Pahayag sini nga lainlain ang kondisyon sang mga kabataan nga may autism kag nagapasalamat na lamang ini nga may dako nga kompanya nga naghatag sang tyansa sa iya bata nga makatrabaho apisar sa kondisyon.
Nagatulo man ang luha sini sa pagsaysay sang kabalaka sa kun ano ang mangin sitwasyon sang bata sa tion nga siya ang bawion na sang Ginoo sa kalibutan.
Samtang paagi sa organisasyon, sarang man makabuligay kag makapautwas sang mga ginikanan nga may kaangay nga kabudlayan.
Suno kay Arroyo, mahapos lamang ang pagdeal sa mga kabataan nga may autism apang ini ang makapoy bangod sila ang dapat nga may daily routine.
Ang film showing sang Biyernes sa SM City Bacolod ang nagahatag naman sang warm welcome sa mga kabataan nga may Autism, nga mabatyagan man nila nga sila ang belong.
Bangod sensitibo ang sensory organs sang mga ini, gin-adjust man ang lightings kag sounds sa sinehan agud maka-adoptar kag ma-enjoy sang mga kabataan.
Paathag ni Arroyo nga ang Autism Society Philippines ang nagaserbe lamang nga recommendatory body, kag mas maayo nga magseek sang professional help nga makahatag sang programa para sa mga kabataan nga may autism.
