Ginpaathag sang presidente sang mga restaurant sa Manokan Country nga ginatuman sang mga ini ang pagsulundan suno sa mando sang IATF.
Nahibaluan nga sa pagpanaog sa modified general community quarantine, ginapahanugutan naman ang pagdine-in sa mga restaurant apang may pila ka limitasyon.
Sa interview sang Bombo Radyo Bacolod kay David Montoya, presidente sang mga may kalan-an sa Manokan Country, ginpaathag sini nga pwede na makadine-in sa restaurant, kag ginasigurado naman sang mga ini nga nakahanda ang mga ini sa pagbaton sa kustomer.
Para makasunod sa mando sang gobyerno, nagabutang man ini sang towel kag alcohol nga gamit sa pagdisinfect.
Ginapatuman man sang mga ini ang social distancing.
Apang pahayag man sini nga dyutay lang ang mga nagakaon diri kay ang ginasaligan lang sini sadto amo ang mga naga-alabot nga customer gikan sa naga-abot nga barko kag eroplano apang wala na ini sa karon.
Samtang ginasiguro naman sini nga kun may mag-alabot nga grupo sang makaon, pagatungaon man nila ang mga ini agud nga indi mag-ulupod sa isa ka lamesa.
Samtang tanan naman sa customer diri ang may-ara gid sang facemask kag ginahukas lang kun magakaon na.
Antis naman magsulod, may paga-agyan nga footbath kag may natalana nga magamit nga alcohol.
Suno diri, naedukar naman ang mga tinawo sini bangod nagpatigayon na sang briefing ang City Health Office sa ila.
May ara naman sang listahan sang patakaran kag polisiya nga ginhatag sa mga ini agud nga masiguro nga matuman ang mga pagsulundan.
Mensahe naman sini sa mga empleyado nga magpabilin lang sa pagsunod sa mga layi nagikan sa gobyerno agud nga wala sang mangin problema.
Sa obserbasyon naman sang Bombo News Team, may ara lamang sang isa ka bangko sa tagsa ka lamesa sa restaurant agud nga masiguro nga wala sang magtinuparay.
