Ginahatagan sang 3-day notice ang mga kandidato nga makitaan sang mga oversiized nga campaign materials nga ini ang paluson bisan pa yara sa pribado nga propidad.
Suno kay Commission on Election (Comelec) Region 6 Director Wilfredo Jay Balisado, wala sang mangin problema kun yara sa pribado nga propidad basta nakasunod lang sa standard size nga 2 feet by three feet ukon cartolina size.
Pahanumdom naman sini sa mga supporters nag nagatakod sang oversized nga tarpaulin sang ila ginasuportahan nga kandidato nga indi na mamilosopo sa tion nga sawayon ang mga ini bangod ang ila pagbayolar ang magareflect man sa politiko nga ila ginasuportahan.
Paathag ni Balisado nga ginakabig iligal ang mga wala nagasunod sa standard size para sa mga tarpaulins subong nga eleksyon.
Apang indi naman malikawan kun kaisa ang iban nga supporters nga sa tion nga hana paluson ang oversize nga campaign materials sa ila propidad, nagapangisog pa ang mga ini nga magpanghangkat sang pagpasaka sang kaso.
Pahanumdom sini nga ang Comelec ang nagasunod lang sa gina-implementar sang layi.
Nahangpan man sang mga ini nga ang mga supporters ang luyag nga magbulig sa ila kandidato, apang dapat nga ginareport sa Comelec sa tion nga gikan sa kaugalingon nga bulsa ang pagpahimo sang campaign materials.
Suno kay Balisado nga madamo sang kahigayunan nga nagatuman sa campaign rules ang mga kandidato apang ang ila nga mga supporters amo ang nagalapas.
Paathag sang opisyal nga may limitasyon ang rights of expression nga ginapanindugan sang iban.
Suno kay Balisado, agud nga mangin patas ang playing field sang mga nagapapili, may ginhuman nga Republic Act 9006 ukon ang Fair Election Act nga amo ang ginasunod sang Comelec.
Paathag sang Regional Director nga may natalana lang nga budget para sa kampanya ang mga nagapapili gani dapat nga accounted man ang mga donations.
Pahanumdom ni Balisado nga importante nga nakabutang sa posters nga gindonar sang supporter ang “paid for by” kag “printed at”.
Dugang pa sang Comelec Regional Director nga may mga kandidato na sadto nga nakaangkon sang penalidad bangod sa sobra nga nagastos sa eleksyon, nga mahimo man matabo sa tion nga malakip sa orihinal nila nga gastos ang mga campaign materials gikan sa supporters apang wala gin-endorso sang pormal sa Comelec.
