Nakigbahin ang 79th Infantry Battalion sang Philippine Army sa ginpatigayon nga Peace Covenant Signing ang mga kandidato sa local elections sa ciudad sang San Carlos sang Enero 04, 2022.
Sa interview sang Bombo Radyo kay 79th IB Commander Office Lt. Col. J-jay Javines, isa lamang ka partido ang nagpapili kag wala sang kontra ang mga kandidato sa pagka-alkalde, bise-alkalde kag mga konsehal.
Apisar nga wala sang opposition, nagpatigayon gihapon sang peace covenant signing agud mapakita ang suporta kag commitment sa pag-agom sang safe, patas kag hilway nga National kag Local Elections sa Mayo 09, 2022.
Yara man sa aktibidad sanday Acting Election Officer Atty. Kathrina Trinio-Cania; Police Lt. Col Jesus Mesahon, chief of police sang San Carlos City Police Station; Vical General Msgr. Erwin Magnanao; kag Mayor candidate kag incumbent Mayor Renato Gustilo kaupod ang iya mga kandidato sa pagkabise-alkalde kag konsehal.
Sa mensahe ni Javines, ginhangkat sini ang mga kandidato nga magcommit sang ila kaugalingon kag magsunod gid sa mga nakasaad sa covenant para sa malinong kag matawhay nga eleksyon.
