Nasaylo na ang mga Kanlaon evacuees sa Bago City sa mga Bahay Kubo nga resettlement site.
Madumduman nga nagbakal ang Bago City Government sang 50 ka Bahay Kubo agud magserbe nga resettlement area sang mga Bagonhon nga nagapuyo sa sulod sang 6km Extended Danger Zone sang Bulkan Kanlaon.
Sa interview sang Bombo Radyo Bacolod kay Merijene Ortizo, head sang Bago City Disaster Risk Reduction and Management Office, 22 ka pamilya ukon 80 ka indibidwal ang ila nga ginrelocate sa resettlement site nga gintawag “Payag sang Kapag-on village”.
Ang Bahay Kubo ang nagabalor P50,000 kada isa, kag may-ara na sang kwarto, banggerahan kag salas, nga mas maayo sangsa mga tents ukon tolda.
May mga separado man nga Bahay Kubo para naman sa Camp Management Team, Medical Team, Security personnel kag may-ara man sang Bahay Kubo nga nagaserbe nga Child-friendly spaces kag Mother-friendly spaces.
Pasalig ni Ortizo nga padayun ang ila nga paghatag sang suporta sa mga evacuees kaangay sang foodpacks, kag ang Negros Occidental Provincial Government ang nagaprovide man para sa sud-an.
Na-install naman ang kuryente kag tubig sa nasambitan nga mga Bahay Kubo.
