Ginakalipay sang alkalde sa banwa sang La Castellana nga nakapauli na gid man ang madamo nga mga evacuees sa sulod sang 4 to 6km extended danger zone sang Bulkan Kanlaon.
Nagdangat sa 271 ka pamilya ukon 1,586 ka indibidwal ang natigayon nga napapauli sa ila mga panimalay subong nga adlaw.
Sa interview sang Bombo Radyo Bacolod kay La Castellana Mayor Aniejo Nicor, ginapasalamatan sini nga napanaog na sa Alert Level 2 ang status sang Bulkan.
Nagbulig sa pagdul-ong pauli sa mga Interally Displaced Persons ang Negros Occidental Provincial Government kag Office of the Civil Defense – Negros Island Region.
Apang ang problema nila bangod madamo sa mga nagpauli ang nagpahayag nga guba na ang ila nga balay.
Ini bangod gintuktukan kag nagakabuslot ang mga atop sang mga balay bangod sa mainit nga abo nga ginbuga sang Bulkan Kanlaon ilabi na nga madamo nga pamalay ang human sa light materials.
Ubos naman ang quick response fund sang banwa gani sila ang wala na sang mapagwa, apang sila ang nagapakig-angot pa sa assistance sang provincial government.
Nagpadala man ang OCD sang sin agud magamit sang mga pumuluyo nga naguba ang atop.
Samtang suno kay Nicor may 27 pa ka pamilya nga mabilin sa evacuation site.
Sila ang mga nagapuyo sa sulod sang permanent danger zone, nga indi na pabalikon.
Lima ka pamilya ang gikan sa Brgy Biak na Bato, 10 ka pamilya sa Barangay Masulog kag 12 ka pamilya sa Brgy Cabagnaan.
Nagakoordinar man ang alkalde sa provincial government angot sa permanent relocation site.
Samtang…ginkalipay sang gobernador sang probinsya sang Negros Occidental ang pagpanaog sang alert level status sang bulkan Kanlaon.
Madumduman nga ginapapanaog na sang Philippine Institute of Volcanology and Seismology (PHIVOLCS) ang alert status sang bulkan halin sa alert level 3 nga ginpanaog sa alert leve 2.
Sa alert level 2, indi sa gihapon makapauli ang mga residente nga nagapuyo sa 4km Permanent Danger Zone (PDZ) apang ginapahanugotan ang pagpauli sang mga nagapuyo sa 6km PDZ.
Suno kay Governor Eugenio Jose ‘Bong’ Lacson, maayo nga balita nga napanaog na ang alert level kag sila ang magafocus na lamang sa mga residente nga nagapuyo sa 4km PDZ.
Suno diri, importante nga mahatagan sila sang relocation site bangod nangin leksyon na ang natabo nga paglupok sang bulkan sang tinalikdan sa mga nagapuyo malapit sa bulkan.
