Nag-ugyon ang mga miyembro sang Caritas Philippines Social Action Network sa panawagan nga indi pag-ipaiway sang Senado ang impeachment proceedings batok kay Vice President Sara Duterte.
Ang panawagan ang ginpagwa isa ka adlaw antes magtipon ang Senado bilang impeachment court sa pagpanguna ni Senate President Alan Peter Cayetano.
Sa pahayag nga pirmado sang 167 ka mga pari kag obispo, ginpaathag sang grupo nga obligasyon sang Senado nga sundon ang Konstitusyon kag ipatigayunon gilayon ang trial.
Suno diri, ang anuman nga pag-delay sa impeachment trial ang kaangay sa pagpadugay sang hustisya—indi lamang para sa publiko kundi mangin para sa bise presidente.
Nagpanawagan man ang Caritas Philippines sa mga simbahan kag komunidad nga magpatigayon sang dungan nga pagpatunog sang kampana kada mag alas-dose sang udto kag alas-sais sang gab-i, kasubong man sang candle-lighting kag pagpangamuyo para sa patas kag nagakaigo nga trial.
Gin-agda man nila ang mga tumuluo nga pangamuyuan ang mga senador, prosecution panel, kag defense panel agud makapaminsar sang maayo, makapili sang insakto, kag maghimo sang tikang nga nagabase sa layi kag kamatuoran.
