Igadeploy ang mga kapulisan sa nagkalain-lain nga area sa ciudad sang Bacolod agud maghatag sang seguridad nga mangin malinong ang nationwide transport strike sa Lunes, Nobyembre 20 tubtob Miyerkules, Nobyembre 22.
Sa interview sang Bombo Radyo Bacolod kay Police Lt. Col. Ronnie Brillo, commander sang Bacolod City Mobile Force Company, naghatag na sang direktiba si Bacolod City Police Office Director Police Col Noel Alino sa mga station commander sang Bacolod City Police Stations nga magcoordinate sang gilayon sa mga transport group nga magaparticipate sa transport strike.
Suno kay Brillo, ginarespeto sini ang tanan nga luyag magpartisipar sa transport strike.
Magadeploy ang BCPO sang uniformed personnel nga magahatag sang seguridad sa transport sector nga nakigbahin sa transport strike, kasubong man sa mga wala nagpartisipar kag sa mga commuters sa ciudad.
Para naman sa mga pumuluyo nga mastranded sa byahe, yara ang libre sakay program sang BCPO.
Sa karun, ginapa-submit na ang mga station commander sang ila mga posible nga ruta para maserbisyohan ang mga pumuluyo nga mastranded sa isa ka lugar.
Pahayag ni Brillo, kun sin-o man ang magapartisipar sa transport strike kag sa wala man luyag nga magpartispar diri nga kun tani wala sang ano man nga insidente, kinagamo ukon dako nga problema nga magluntad.
