Naggamit na ang mga otoridad sang drone agud mas mahapos nga makit-an ang tatlo sa lima ka mga pugante sa Negros Occidental District Jail nga ulihi nga nakit-an sa Hacienda Veles, Barangay Blumentritt, Murcia, Negros Occidental kaina sang aga.
Una diri, napatay si Marvin Celeste matapos matiruhan sang mga pulis samtang pilason naman si Danilo Tamon sang sila ang nagpalagyo.
Suno kay Police Capt. Jerald Muya, hepe sang Murcia Municipal Police Station, nagresponde man ang 1st Negros Occidental Provincial Mobile Force Company (NOCPMFC) agud nga magbulig sa ila sang mga personnel sang Bureau of Jail Management and Penology.
Suno kay Moya, naggamit sila sang drone sang Mobile Force Company agud mas mahapos nga makit-an sanday Francisco Epogon, Danilo Celeste kag Alejandro Montoya sa malapad nga katubuhan.
Ang tubo ang kutob na sa lumapaw sang tawo.
Nakakuha man sila sang impormasyon nga yara lang sa kampo nagapanago ang mga pugante.
Kaina sang aga, ginkumpirmar ni Jail Chief Inspector Jairus Anthony Dogelio, spokesperson sang BJMP Region 6 nga nagtanyag ang regional director sang Bureau of Jail Management and Penology (BJMP) sang P10,000 nga reward sa sin-o man nga makahatag sang impormasyon nga makabulig sa pagkadakop sang kada pugante.
