Preparado na ang mga kapulisan sa ciudad sang Bacolod kag probinsya sang Negros Occidental sa mga pagsugata sang mga bisita sa ceremonial activation sang Police Regional Office – Negros Island Region alas-2:00 karun sa hapon.
Ang aktibidad ang patigayunon sa convention hall sang Acacia Hotel sa reclamation area.
Sa interview sang Bombo Radyo Bacolod kay Negros Occidental Police Provincial Office Spokesperson Police Captain Judesses Catalogo, preparado na ang security plans kag road security para sa mga magaabot nga matag-as nga opisyal sang Philippine National Police (PNP) kag iban pa nga ahensya sang gobyerno.
Apang aminado ini nga sila ang wala sang opisyal nga listahan sang bisita.
Nagpreparar naman ang mga personnel nga magahatag sang arrival honor sa mga National Officials kalakip sanday Police Major Elmer Bonilla, station commander sang Bacolod Police Station 4; Police Captain Francis Depasucat, station commander sang Bacolod Police Station 1 kag Police Lt. Col. Joery Puerto, ang head sang Operation and Management Unit sang Bacolod City Police Office.
Samtang ang Talisay kag Silay City Police Station naman ang naghatag sang road security sa convoy sang mga bisita halin sa Bacolod-Silay Airport kag sal-on sang BCPO kag Bacolod Traffic Authority Office pagdangat sa ciudad sang Bacolod.
Nahibaluan nga sa NOCPPO headquarters kuntani patigayunon ang ceremonial activation, apang bangod sa limitado nga space, nadisisyunan nga didto na lamang sa Acacia Hotel.
Nagalibot man sa area ang Canine Units sang BCPO para sa dugang nga seguridad.
Paathag ni Catalogo nga ini ang seremonya na lamang agud mangin opisyal, bangod una na nga naturn over ang mga resources sa PRO-NIR.
Ang temporary office sang PRO-NIR ang yara sa sulod sang NOCPPO Headquarters.
Karun man mahibaluan kun sin-o ang magapungko nga PRO-NIR Director.
