Nagdeploy sang mga kapulisan ang Bacolod Police Station 9 agud magbantay sa seguridad sang selebrasyon sang kapiestahan ni San Juan de Bautista sa mga beach resorts sa Barangay Punta-Taytay, Bacolod City.
Nahibaluan nga nagadagsa man ang mga nagabisita sa mga baybayon sa nasambitan nga kaadlawan.
Sa interview sang Bombo Radyo Bacolod kay Police Captain Michael Tuburan, officer in charge sang Bacolod Police Station 9, sila ang nagdeploy sang 14 ka mga Police Personnel nga buddy-system nga nagalibot sa sitwasyon sang mga baybayon.
Magluwas sa mga kapulisan, may mkasobra 30 man nga force multiplier nga naga-upod sa mga police personnel.
Magluwas sa mga nagapatrolya, sila ang naghamtang man sang Police Assistance Desk nga sarang mapalapitan sang mga pumuluyo kun may problema kag may tatlo man ka patrol car nga nagalibot-libot sa area.
Sila ang una naman nga nagsapol sa mga Barangay officials sa pagpatigayon sang rerouting.
Ini agud indi maggutok ang trapiko ilabi na nga madamo sang mga salakyan nga nagasulod agud magpadulong sa mga beach resorts.
Ang aktibidad ang gin-umpisahan sa misa kaina sang aga, samtang may ara man sang basyahanay sa dalan, kag sa gab-i magapatigayon man sang foam party ang Sangguniang Kabataan.
Panugyan na lamang ni Tuburan nga kun mahimo likawan na lamang ang mag-inom sa mga magalagaw sa dagat agud malikawan ang mga disgrasya samtang hagan-hagan lamang sa pagbasyahanay.
Samtang humalin pa kagab-i nga nagabantay ang grupo nga Mountain Tigers bilang life guards sa mga beach resort sa Barangay Punta Taytay.
Sa interview sang Bombo Radyo Bacolod kay Ronilo Carmona, Unit Commander sang Mountain Tigers, halos 30 ka tuig na ini nga nagaserbe nga life guards.
Suno diri, indi gid tuman ka puno ang mga baybayon subong nga selebrasyon sang kapiestahan ni San Juan de Bautista bangod weekdays kag madamo sang may trabaho.
Sa 30 ka tuig nga pagserbisyo, preparado naman si Carmona sa mga mahimo matabo nga insidente sa baybayon.
Isa sa pahanumdom sini nga indi gid pagpabay-an ang mga kabataan kun magpadulong sa mga beach resorts bangod aminado ini nga sa kadamuon sang tawo, indi tanan ang ila mabantayan.
