Full blast na ang deployment sang security personnel sang Bacolod City Police Office, mga kapulisan nagikan sa Police Regional Office-Negros Island Region kalakip na ang augmentation force gikan sa Police Regional Office 6.
Sa interview sang Bombo Radyo Bacolod kay Bacolod City Police Office Police Director Police Col. Eugene Rebadomia, nakatutok sila sa Bacolod City Government Center kag sa The Upper East Megaworld apang may yara naman sang security deployment sa Lacson Tourism strip kag Bacolod City Public Plaza.
Suno kay Rebadomia, lain ang deployment sa aga kag amo man sa hapon.
Ginpahayag man sini nga isa sa mga pagpanghangkat amo ang pagdala sang mga festival goers sang mga ginadumilian nga gamit kaangay sang backpack.
Suno kay Rebadomia, wala ginapasulod sa festival sites ang may dala nga backpack.
Samtang may yara man sang insidente sang pagpangawat sang cellphone apang nadakpan man gilayon bangud sa madamo nga deployment sang kapulisan sa Bacolod Public Plaza.
Panawagan sini sa mga pumuluyo nga siguruhon nga naka-lock ang balay sa tion nga magpadulong sa mga festival sites.
Ginpasalamatan man sini ang tanan nga mga pumuluyo sa Bacolod nga nagasunod sa mga pagsulundan agud nga mangin matawhay ang pagpatigayon sang Masskara Festival 2026.
