Padayon ang ginapatigayon nga operasyon sa paglagas sang duha sa tatlo ka mga suspek nga nagbuno-patay sa manunudlo sang Binalbagan Catholic College sang kahapon sang kaagahon.
Sa interview sang Bombo Radyo Bacolod kay Police Major Randy Babor, Chief of Police sang Binalbagan Municipal Police Station, nagpatigayon sila sang follow-up operation agud nga madakpan ang duha ka nabilin pa nga suspek nga nagpatay sa biktima nga si Tony Lazaga.
Nahibaluan nga kahapon, nadakpan ang isa sa tatlo ka mga suspetsado kag ini ang ginkilala kay Johnrey Castino alyas Jansen, 19 anyos kag residente sa Purok Apitong, Barangay San Teodoro, Binalbagan.
Suno kay Babor, ang mga suspetsado ang mga magbarkada lang man kag natultulan naman sang mga kapulisan ang ginatiniran sang mga ini apang wala sila naabtan.
Sa karun ginaproseso na sang Binalbagan Municipal Police Station ang mga dokyumento para sa pag-inquest sa kaso nga ipasaka batok kay Johnrey Castino alyas Jansen, 19 anyos.
Wala naman narecover ang cellphone sang biktima sa paghinakop ni Castino nga ginatudlo nga nagkuha sang cellphone.
Ginpahayag man sang hepe nga hold-up ang tinituyo sang mga suspek apang bangud sa cramming nga napatay sang mga ini ang biktima, nagkalabilin ang laptop, wallet kag iban pa nga gamit sang manunudlo.
Suno diri, ang mga suspek ang konektado sa grupo sang mga indibidwal nga nagaengaged sa iligal nga druga sa banwa sang Binalbagan nga ila man ginamonitor.
