Suportado sang Negros Occidental Police Provincial Office ang bag-o nga pinuno sang Philippine National Police sa pagpanguna kag mga plano sini.
Kahapon, nagpungko bilang bag-o nga pinuno sang Philippine National Police si Police General Benjamin Acorda Jr. nga suno diri, wala ini sang plano nga mag-untat sa pagtrabaho nga mahatagan sang siguridad sa saferty ang mga pumuluyo kag plano man sini nga kakson sa serbisyo ang mga kapulisan nga may kaangtanan sa ilegal nga butang.
Dugang pa niya, patas ini kun maghatag sang award kag penalidad kag iya paga-basehan ang abilidad kag moral sang isa ka indibidwal antes ini I-assign sa trabaho.
Samtang, sa interview sang Bombo Radyo kay Police Captain Judesses Catalogo, spokesperson sang NOCPPO, suportado sang ahensya ang bag-o nga pinuno sang PNP sa mga plano sini kag ila man ginaekspektaran ang mga bag-o nga kasuguan gikan diri.
Kasunod sa pahayag ni Acorda sa safety sang pumuluyo, ila man pasanyogon pa gid nga mapalapta kag mabatyagan sang komunidad sa Negros Occidental ang presensya sang kapulisan.
Samtang, ginpasalamatan sini ang probinsya sang Negros Occidental sa suporta nga ila ginhatag nga nangin Top 1 ang NOCPPO sa kabug-osan nga Police Regional Office (PRO) – 6 sa maayo nga resulta sang ila trabaho ilabi na sa illegal nga druga, illegal gambling kag pag-aresto sa mga wanted persons.
Mensahe ni Catalogo, nagatrabaho ang NOCPPO sang husto agud mapabatyag sa Negros Occidental ang katawhayan nga pagpuyo sa probinsya.
