Ginpahayag ni political analyst Atty Jomax Ortiz nga ang pagserbe sang warrant of arrest ang wala nakadepende sa tindog sang isa ka tawo sa sosyudad.
Kahapon, kapin alas- 5:00 sang kaagahon, ginsulong sang masobra dos mil ka mga kapulisan ang Kingdom of Jesus Christ (KOJC) compound para magserbe sang warrant of arrest kay Pastor Apollo Quiboloy.
Sa komprontasyon sa mga KOJC members, apisar nga naghatag sang warning, sa paghaboy sang tear gas, duha ang napatay bangod sa cardiac arrest samtang may yara man sang nalipungan, kag may duha nga gikan sa engineering department nga nagapabilin nga missing.
Suno kay Ortiz, wala na kuntani sang kabudlayan pa kun ginsurrender na lamang si Quiboloy.
Ginkwestyon man sang abogado nga kun nagasinggit sang hustisya ang mga miyembro sang KOJC, paano mahatag ang hustisya kun ginapunggan ang pagserbe sang warrant of arrest sa isa ka dalakpon.
Suno kay Ortiz, wala sang problema kun i-allow ang kapulisan nga magserbe sang warrant bangod nga nakahibalo sila sang ila trabaho.
Dugang pa sini, common sense na lamang nga mas ginpadako ang numero sang kapulisan nga ginpadala sa area bangod nga sang nakaligad sa una nga beses nga ginserbe ang warrant wala nakasulod ang mga pulis bangod sa pagpamalabag sang mga miyembro sang KOJC.
Sa karun, kun luyag man nila magrally kag manawagan kay President Ferdinand Marcos Jr, suno sa abogado indi man sa gihapon pagbawion sang presidente ang pagserbe sang warrant kay Quiboloy bangod nga wala nakadepende kun ano ang tindog sang pastor sa sosyudad para panason ang warrant of arrest batok sa iya.
Pahayag ni Ortiz, indi inutil ang gobyerno para indi magpa-implementar sang layi.
