Nagadangat sa kapin P100,000 ang balor sang nakawat nga baligya kag P50,000 ang nakawat nga kwarta sang duha ka wala nakilal-an nga kawatan nga nagsulod sa isa ka bloke sa Concepcion Public Market, Zone 4, Barangay Concepcion, Talisay City, Negros Occidental, ala 1:30 kaina sang kaagahon.
Sa interview sang Bombo Radyo kay Police Major Karena Onio, Deputy Chief of Police sang Talisay City Police Station, ang kaso nga pangatubangon sang duha ka suspetsado amo ang robbery with homicide kag frustrated murder.
Ang mag-asawa nga mga biktima ang ginkilala nga sanday Ildefonso Medalla kag Denalyn Medalla, residente sang Hda Gloria, Brgy Concepcion.
Suno diri, kaina sang kaagahon sang nag-abot sa ila nga bloke ang mag-asawa, nanaog sa ila motor si Denalyn samtang si Idelfonso naman yara lang sa ila motor.
Nakita sang mag-asawa nga may mga tawo nga nagagwa sulod sa katupad nila nga bloke kag ila pa ini ginsaway.
Nakita sang duha ka suspek ang bag nga yara sa bana, kag ini ila gintinguhaan nga kawaton apang wala nagpasugot si Idelfonso amo nga ila ini gintiro sang apat ka beses.
Dead on the spot si Idelfonso samtang si Denalyn naman gintiro sang isa ka bes sa tyan apang ini nakapalagyo kag nakapangayo sang tabang sa mga residente.
Pahayag ni Onio, nagdangat sa kapin P100,000 ang balor sang nakawat nga baligya kag P50,000 ang nakawat nga kwarta.
Para kay Onio, eksperyensyado ang duha ka kawatan santo sa ila nga paggiho kag paghimo sang pagpangawat.
Narekober sa area, ang walo ka pakete sang sigarilyo kag isa ka putos sang sinsilyo nga nawigit sang mga kawatan, kasubong man nga narekober sa area ang apat ka basiyo kag isa ka liso sang wala nahibaluan nga calibre sang armas luthang.
