Ginturn-over na sa Mabinay Municipal Police Station ang tatlo ka mga lalaki nga nagkawat sang cell site batteries sa amo nga banwa kag nadakpan diri sa ciudad sang Bacolod sang Biyernes sang hapon.
Madumduman nga ang mga suspetsado ang nadakpan paagi sa joint operation sang Mabinay Municipal Police Station kag Bacolod City Police Office matapos nga nagbaligya sang cell site batteries sa junk shop sa Dalan Mabini, Barangay 25, Bacolod City.
Ginkilala ang mga ini kanday Erwin Aribato, 30-anyos, residente sang Purok Riverside, Barangay Banago; Romelyn Quiatchon, 26-anyos, residente sang Purok Mahimulaton, Barangay Banago; kag Joseph Villanueva, 30-anyos, residente sang Purok Kasagingan, Barangay Banago.
Suno kay Police Lt. Col. Sherlock Gabana, spokesperson sang BCPO, napasakaan na sang kaso nga robbery ang mga nadakpan kalakip na ang isa nga nakapalagyo.
Ginturn-over man sa mga pulis sa Mabinay ang van nga gingamit sang mga suspetsado bangud kabahin ini sang ebidensya.
Santo sa pag-usisa, ang van ang ginrentahan sang mga suspetsado sa ciudad sang Bacolod kag ila nga gamiton kuntani sa sulod sang pito ka adlaw.
Nagpakita man sang kontrata ang tag-iya sang van nga ginrentahan ini.
Samtang, ang kaso nga paglapas sa Anti-Fencing Law batok sa tag-iya sang DLC junk shop ang igapasaka sang Mabinay Municipal Police Station kag Task Force Kable sang ciudad sa prosecutor’s office diri sa Bacolod bangud diri ini nahamtang.
Ang 136 ka batteries nga yara na sa junk shop ang ila ginkawat sa Estefania, Granada kag Pahanocoy kag nagabalor sang P15 million.
