Masobra P17 million ang nagenerate nga income sa mga kiosk sa Bacolod City Public Plaza kag Bacolod City Government Center sang Masskara Festival 2025.
Sa interview sang Bombo Radyo Bacolod kay Councilor Jason Villarosa, nagsumiter na sa ila si festival director Rodney Escalon sang report sa nagenerate nga income santo sa ginsumiter sang mga concessionaire sa Bacolod Gugma Foundation gikan sa duha ka festival sites.
Sa pagbaligya sang mga concessionaire sa Bacolod City Public Plaza halin Oktubre 1 tubtob 19, nagdangat sa P11.87 million ang nagenerate nga income kun sa diin dako nga porsyento diri ang gikan sa mga nagabaligya sang inasal ukon grillers.
Samtang P5.19 million naman ang nagenerate nga income sa Bacolod City Government Center kun sa diin P4.79 million diri ang gikan man sa grilling stations.
Sa karun ginahulat ang report tuhoy sa nagenerate nga income sa tatlo ka adlaw nga pagbaligya sa Lacson Tourism Strip.
Suno kay Villarosa, apisar nga naka-eksperyensya sang mga pag-ulan kag may mga adlaw nga mahina ang customer, ginapakamaayo nila nga nakaginansya ang mga vendors.
Pahayag sini nga siya mismo ang nakasaksi sa kadamuon sang mga naglagaw kag nagkaon sa mga food stalls sa opening kag highlights sang Masskara Festival 2025.
Ginapakamaayo man sini nga temprano natapos ang awarding ceremony sa Arena and Street Dance Competitions, gani ang nabilin nga oras sa highlights ang nagamit pa sang mga pumuluyo sa pagbakal ukon pagkaon sa mga kiosk.
Kasubong man sa Lacson Tourism Strip nga apisar nangin maiwat ang income sa nauna nga duha ka adlaw bangod sa pag-ulan, halos nagkala-ubos man ang supply sang mga grillers sa ulihi nga adlaw sang kapiestahan.
Ang ciudad ang magapatigayon pa sang repeat performance sang tanan nga mga nagchampion sa Arena and Street Dance Competition School kag Barangay category kasubong man sa Electric Masskara sa Bacolod City Government Center sa Domingo bilang pagpasalamat
