Nagpatigayon ang House Committee on Agriculture and Food sang public hearing para sa proposed amendment sang Republic Act 10659 ukon Sugarcane Industry Development Act of 2015 ukon SIDA Act sa Nature’s Village resort sa ciudad sang Talisay, Negros Occidental.
Ginpangunahan ang public hearing sang chairman sang House Committee on Agriculture and Food nga si Representative Mark Enverga.
Yara man ang mga miyembro sang nasambit nga House Committee nga sanday Congressman Stephen Paduano, Congressman Dino Yulo, Congressman Mercedes “Cheding” Alvarez, Congressman Kiko Benitez, Negros Oriental Congressman Manuel Sagarbaria kag Congressman Greg Gasataya.
Nagtambong man ang tiglawas sang Land Bank of the Philippines kag DOST.
Ang nasambit nga committee hearing ang ikatatlo na kag ginpatigayon sa Negros Occidental agud nga makapabutyag man ang mga sugar producers sang ila dapat man ipalab-ot kag ang hearing ang gin-author ni Congressman Kiko Benitez.
Ginaduso sang mga kongresista nga ang tuigan bugdet ang dapat magsaka sa P5 billion gikan sa P2 billion sa maabot nga mga tinuig nga magaumpisa sa 2026.
Ini bangud nga sa 2025 yara sagihapon sa P1 billion ang budget.
Ang ginaduso nga pagpasaka sang budget ang agud nga mapatuman ang mga programa sa idalom sang SIDA Law nga kinahanglanon sang sugar industry agud nga mangin produktibo ini indi lang sa Negros Island kundi sa bug-os man nga Pilipinas.
