Ginkondenar sang mga mamalidha sang Batangas ang alegasyon sang ila kaupod nga mamalidha nga si Batangas 1st District Representative Leandro Leviste batok kanday Executive Secretary Ralph Recto kag Governor Vilma Santos-Recto.
Madumduman nga gin-akusaran ni Leviste ang mag-asawa sang ginaalegar illegal campaign financing, bribery, kag iban pa.
Gin-file sang Batangas lawmakers ang House Resolution No. 994 nga nagaunod sang ila pagkondena sa akusasyon ni Leviste kag nagasiling nga wala sang basehan, kag makaguba sang reputasyon.
Lima sa anum ka tiglawas sang Batangas ang nagpirma sini nga ginalakipan nanday:
6th District – Rep. Ryan S. Recto
5th District – Beverly Rose A. Dimacuha
4th District – Amado Carlos A. Bolilia IV
3rd District – King George V. Collantes
2nd District – Gerville “Jinky Bitrics” A. Reyes-Luistro
Madumduman nga ginpahayag ni Leviste nga dalagko nga pondo ang ginagastos sa Batangas kada eleksyon.
Sang nakaligad nga adlaw, iya man gin akusaran ang tanan nga myembro sang Kamara de Representantes nga nagabakal sang boto apang hugot ini nga ginpanginwala sang mga mamalidha, apang ginbawi ini ni Leviste kag ginklaro nga indi tanan kundi pipila ka kongresista ang ginaalegar nagavote-buying.
